Анх 1925 оны 5 дугаар сард Монголын анхны агаарын замыг нээж, “Агаар тандагч” гэсэн тусгай орон тооны хүн ажиллаж байжээ.

1947 онд Урьдчилан мэдээлэх групп байгуулагдаж, урьдчилсан мэдээгээр хангах болов.

1967 оны 8 дугаар сарын 31-ний 134 дүгээр тушаалаар Иргэний агаарын тээврийг цаг агаарын мэдээгээр үйлчлэх станц анх байгуулагдаж, нислэгийг цаг агаарын мэдээгээр хангах үүргийг дагнан гүйцэтгэх болсон.

1978 оны 7 дугаар сарын 18-ны өдрийн БНМАУ-ын СнЗ-ийн Ус цаг уурын албаны удирдах ерөнхий газрын даргын 78 дугаар тушаалаар Нислэгийн цаг уурын төв болгон өргөтгөж, Буянт-Ухаа цаг уурын станц, Морин-Уулын радарын станцыг нэгтгэн зохион байгуулсан.

8 дугаар сарын 15-наас 11 дүгээр сарын 5 хүртэл МРЛ-2 маягийн радиолокаторын станцыг угсарч, шинээр ашиглаж эхэлсэн.

1985 онд Буянт-Ухаа станцад үүлний өндөр хэмжигч ИВО төхөөрөмжийг суурилуулсан.

1989 онд ФИ-1 төхөөрөмж, радио хүлээн авагч Р-399, электрон телетайп F-2000 суурилагдсан.

1993 онд Буянт-Ухаа станцад VAISALA фирмийн цаг уурын ажиглалтын MILOS-200 автомат станц суурилагдсан. Оны сүүлийн хагасаас мэдээллийн ажилд шинэчилсэн МЕТАР код ашиглаж эхэлсэн.

1996 онд мэдээлэл солилцоонд ПС-386 компьютер ашиглаж эхэлсэн.

1998 оны 8 дугаар сарын 1-ээс эхлэн “Монгол улсын Ус цаг уурын албыг хөгжүүлэх мастер төлөвлөгөө”-г 3 үе шаттай боловсруулан хэрэгжүүлж, уг төслийн эхний үе шатанд Морин-Уулан дахь цаг уурын станц, Радарын станцыг Вайсалагийн цаг уурын автомат станц, Допплерийн Радараар /RC-53C/ шинэчлэн тоноглож, радарын станцын 4 давхар барилга барьж, УЦУОШГ, УЦУХ, НЦУТ, нислэгийн удирдлагын шинэ цамхаг, болон Монгол телевизэд радарын мэдээг шууд бичил долгионоор дамжуулах иж бүрэн системийг 1999 оны 12 дугаар сард ашиглалтад өгсөн. Техникийн өндөр үзүүлэлттэй эдгээр тоног төхөөрөмж ашиглалтанд орсноор агаарын температур, чийгшил, даралт, салхины чиглэл, хурд, орсон тунадасны хэмжээ зэрэг цаг уурын үндсэн элементүүдийг нарийвчлалтай хэмжих, эргэн тойрон 500 км хүртэлх үйлчлэх хүрээ бүхий газар нутгийг хамарсан орон зайд үүлшлийг илрүүлэх, доторх үйлчлэх хүрээнд тунадас, салхины ажиглалт хийж, цаг агаарын богино, хэт богино хугацааны урьдчилсан мэдээний нарийвчлалыг сайжруулах, түүний дотор Буянт-Ухаа олон улсын нисэх онгоцны буудал орчмын болон радарын үйлчлэх хүрээний цаг агаарыг өндөр таарцтай урьдчилан мэдээлж, нислэг хөдөлгөөний аюулгүй байдлыг хангахад шинэ алхам болсон. Монгол улсын Засгийн газрын 1998 оны 210 дугаар тогтоолоор хяналт шинжилгээний улсын байцаагчийн эрхтэй болов. Синоптикийн ажлын байрыг автоматжуулах ажил эрчимтэй хийгдсэн.

2001 онд ИНЕГ-ын интернэтийн сүлжээнд холбогдов. Нислэгийн цаг уурын төвийн дүрэм батлагдав. 

УЦУОШГ-ын даргын 2001 оны 41 тоот тушаалыг үндэслэн Буянт-Ухаа цаг уурын станцын ажлын байрыг нислэгийн удирдлагын шинэ цамхагт шилжүүлэн байрлуулсан.

Мөн ОУИНБ-аас гаргасан ANNEX-3 зааврын дагуу олон улсын жишигт нийцсэн чиглэлийн урьдчилсан мэдээ бичих НИ-5 хуудас, Хөөрөлтийн урьдчилсан мэдээ зохиох журам, Цаг агаарын байдлын тухай ам зөвлөгөө өгөх журам, GAMET мэдээлэл зохиох журам, RMK бүлгийг хэрэглэх журам ”-уудыг тус тус шинэчлэн боловсруулж үйлчилгээний ажилд мөрдөн ажилласан.

2003 онд Буянт-Ухаа станцад VAISALA фирмийн MILOS-520 автомат станцад тавигдсан. Монгол улсын Хууль зүй, дотоод хэргийн сайдын 2003 оны 34 дүгээр тушаалаар Нислэгийн цаг уурын төвд барааны тэмдгийн гэрчилгээ олгосон.

12 дугаар сарын 24-ний өдрөөс MILOS-520 автомат цаг уурын станцыг нислэгийн цаг агаарын бодит мэдээний хангалтын ажилд ашиглаж эхэлсэн.

2006 оны 3 дугаар сарын 01-нээс “МЕТАР” программын дагуу нисэх буудлуудын бодит ажиглалтын мэдээний электрон сан үүсгэх, архивлах ажлыг эхлүүлсэн.

УЦУОШГ-ын даргын 2006 оны 79 тоот тушаалыг үндэслэн тус төвийн Холбоо зангилгааны салбарыг 2006 оны 9 дүгээр сарын 01-ний өдрөөс татан буулгасан.  

2009 оны 03 дугаар сарын 01-нд Буянт-Ухаа нислэгийн цаг уурын станцын үйл ажиллагааг Нислэгийн удирдагчийн цамхгийн байранд нүүлгэн шилжүүлж, 2009 оны 09 дүгээр сарын 30-нд хөөрч, буух зурвасын дэргэдэх станцын байранд дахин нүүж ажилласан.  

Ус цаг уур, орчны шинжилгээний газрын даргын 2008 оны 6 дугаар сарын 05-ны өдрийн 80 дугаар тушаалаар зохион байгуулалтын бүтцийг шинэчлэн баталсан. 2 хэлтэс, 7 хэсэгтэй байхаар зохион байгуулсан. Шуурхай үйлчилгээний хэлтсийг Мэдээлэл, үйлчилгээний хэлтэс болгож, Технологийн хэлтэс шинээр нэмж, хэлтсийн бүрэлдэхүүнд Буянт-Ухаа нислэгийн цаг уурын станц, Морин-Уул радар, цаг уурын станцыг оруулсан.

2011 онд Цаг уур, орчны шинжилгээний газрын даргын 2011 оны 01 дүгээр сарын 31-ний өдрийн 17 дугаар тушаалаар ИНЕГ-ын харъяа орон нутгийн нисэх буудлын цаг агаарын бодит мэдээний үйлчилгээний ажлыг хариуцан гүйцэтгэдэг орон нутгийн УЦУОША-ны нисэхийн цаг уурын техникчид тус төвийн харьяалалд шилжин ирж, орон тооны дээд хязгаар 53 байхаар зохион байгуулалтын бүтцийн өөрчлөлт хийгдсэн.

ЦУОШГ-ын даргын 2011 оны 156 дугаар тушаалаар орон нутгийн УЦУОША-даас үзүүлдэг нислэгийн цаг уурын үйлчилгээг мэргэжлийн чиглэлийн дагуу тус төвд төвлөрүүлэх болсонтой уялдуулан зохицуулалтын баримт бичгүүдэд нэмэлт өөрчлөлт оруулсан.

2013 оны 5 дугаар сарын 13-нд Нислэгийн цаг уурын төвийн ажлын шинэ байрны хоёр давхар барилга ашиглалтад орсон.

12 сард Нислэгийн цаг уурын төвд Чанарын удирдлагын тогтолцоог ISO9001:2008/MNS ISO9001:2010 олон улсын стандартын дагуу нэвтрүүлж, цаг уурын салбартаа анхдагч нь болсон.

2015 онд GFS-ын мэдээгээр нислэгт зориулсан стандарт өндрүүдийн салхи температурын зураг, WFDAS-ын тоон прогнозын 36, 168 цагийн үр дүнгүүдээр хийгдсэн 3-12 цагийн алхамтай газар, өндрийн прогноз зургуудыг туршилтаар нэвтрүүлэн ашиглаж эхэлсэн нь мэдээлэл үйлчилгээний технологийн хувьд дэвшилт гарсан.

2017 оны 7 дугаар сарын 25-нд Олон улсын иргэний нисэхийн байгууллагаас явуулсан аудитын шалгалтад 100 хувийн үзүүлэлттэй амжилттай хамрагдсан. Нисэх багт онлайн хэлбэрээр нислэгийн замын дагуух чиглэлийн урьдчилсан мэдээгээр үйлчилж эхэлсэн.

2019 онд МАНПИНГ ажлын хэсгийн “Цаг уурын мэдээллийн солилцоо, хэрэгцээ, үйлчилгээ-ний ажлын баг”-ийн анхдугаар хурал зохион байгуулагдсан.

2021 онд Монгол Улсын иргэний нисэхийн салбарт хийгдсэн хамгийн том бүтээн байгуулалт болох Төв аймгийн Сэргэлэн сумын нутаг Хөшигийн хөндий дэх “Чингис хаан” Олон улсын нисэх буудал 2021 оны 7 дугаар сарын 4-ний өдөр үйл ажиллагаагаа эхлүүллээ. Үүнтэй холбоотойгоор Чингис хаан" ОУНБ дахь цаг уурын үйлчилгээний нэгжүүдийн сүлжээ, тоног төхөөрөмжийн үйл ажиллагаа, хүний нөөц, ажлын байрны бэлэн байдлыг хангаж, нислэгийн цаг уурын үйлдвэрлэл, үйлчилгээг нүүлгэн шилжүүлснээр шинэ нисэх буудлын анхны хөөрч, буух агаарын хөлгийн нислэгт цаг уурын мэдээний үйлчилгээг үзүүлсэн. Уг нээлтийн арга хэмжээнд Нислэгийн цаг уурын төвийн анхны дарга Дамдины Дамба урилгаар оролцсон. 

Нислэгийн цаг уурын өртөөний ажлын байрыг төв байранд 2021 оны 07 дугаар сарын 02-ны өдөр нүүлгэн шилжүүлсэн. Өртөөний үйл ажиллагаанд ашиглагдаж байгаа MILOS-520 цаг уурын автомат станц, AWS-310 цаг уурын автомат станцын терминалыг нүүлгэн шилжүүлсэн.

Нислэгийн цаг уурын үйлчилгээнд Чанарын менежментийн тогтолцоог ISO 9001:2016 олон улсын стандартын дагуу хэрэгжүүлснийг баталгаажуулж гэрчилгээ олголоо. Уг гэрчилгээг 2021-2024 он хүртэл 3 жилийн хугацаатай эзэмших эрхтэй боллоо. 

Харилцаа холбооны зохицуулах хорооноос мэдээлэл дамжуулах зурвасын албан ёсны эрх авч, өгөгдөл (дата) дамжуулах урсгал дамжуулах утасгүй холболтын төхөөрөмжийн шийдлийг ашигласан нь орчин үеийн дэвшилтэт технологийг нэвтрүүлсэн дэвшилтэт ажил байлаа.

2023 онд Дэлхийн Цаг Уурын Байгууллага (WMO) болон Олон Улсын Иргэний Нисэхийн Байгууллага (ICAO)-ын стандарт шаардлагад нийцсэн олон улс болон орон нутгийн нислэгт зориулсан цаг агаарын бичиг баримтыг бэлтгэж боловсруулах интернэтэд суурилсан онлайн үйлчилгээний системийг боловсруулан хөгжүүлэх ажлыг 2023 оны 3 дугаар улиралд үйлдвэрлэлд амжилттай нэвтрүүллээ. Энэхүү “Олон улс, орон нутгийн нислэгийн цаг уурын онлайн үйлчилгээний систем”-ийг Нислэгийн цаг уурын төвийн үндсэн сервер компьютер дээр ажиллаж байгаа Мэдээлэл дамжуулах систем (MDS)-тэй интеграци, тохируулгуудыг хийж, мэдээллийн системд тус тус холбосон.

Мэдээлэл бэлтгэж, дамжуулахдаа өгөгдсөн хүснэгтийг бөглөх, сонгох байдлаар гараас оруулдаг болсон нь мэдээллийг хурдан шуурхай бэлтгэх боломжийг бүрдүүлсэн бөгөөд ингэхдээ мэдээллийн өгөгдлийн сан нь цаг уурын буюу технологийн сүлжээ болон интернэт сүлжээнээс тус бүр автоматаар мэдээллийг татаж, бүрдүүлдэг болсон байна. Мөн бүтэц нь ОУИНБ-аас гаргасан нисэх буудлуудыг илтгэх 4 үсгийн кодыг ашиглан нисэх буудлууд болон Дэлхийн бүсчлэлүүд тус бүрээр сонгон шаардлагатай мэдээллүүд (METAR/SPECI, TAF, SIGMET)-ийг хайж авах боломжоор хангагдсан. Бэлтгэж бэлэн болсон мэдээлэл нь тус төвийн үндсэн сервер компьютерт тухайн хэрэглэгчийн нэр, нислэгийн аяллын дугаар, нисэн гарах болон хүрэх буудлын нэр, бэлтгэсэн огноо (цаг, минут, секунд) зэрэг мэдээллийг багтаасан хэлбэрээр архивын хавтас (folder) нээн хадгалж байгаа бөгөөд харин үндсэн веб хуудас дээр тухайн өдрийн тухайн нислэгт харгалзах нэг л мэдээллийг харуулах боломжийг бий болгосон. Олон улс, орон нутгийн дунд болон нам  өндрийн нисэх агаарын хөлгүүдэд зориулсан чиглэлийн урьдчилсан мэдээ НИ-5 хуудсыг хурдан, шуурхай алдаагүй бэлтгэх болон нисэх чиглэлийн дагуух METAR/SPECI, TAF, SIGMET зэрэг мэдээллүүдийг олж авах зэрэгт туслах зорилгоор жишээ маягтуудыг төв болон орон нутгийн байгууллага бүрд тусад нь нислэгийн чиглэлүүдийг үндсэн болон бэлтгэл буудлуудыг бичиж хадгалах, харагдах мөн устгах боломж бүхий бүтэц болон өндрийн салхи температур, радар, хиймэл дагуул болон бусад зураг мэдээллүүдийг тухайн хэрэглэгчийн компьютер дээрээс оруулах (upload) боломж бүхий бүтцийг нэмэлтээр тус тус шийдэж өгсөн. Бэлтгэж боловсруулах мэдээллийн төрөлд заагдсан мэдээллүүдийг бэлтгэхэд зохих шаардлагын дагуу тухайн бичиг баримтад тусгагдах ёстой мэдээллүүдэд утгын болон анхан шатны бүтцийн шалгалт хийж, алдаа гарсан үед анхааруулж, засварлах тухай мэдэгдэл харуулдаг болсон байгаа бөгөөд мэдээллүүдэд анхан шатны заагдсан шалгалтууд хийгдэж алдаагүй болгосон үед мэдээллийг хадгалж, төв сервер рүү дамжуулж, хэвлэхэд бэлэн болдог болсон нь хувь хүнээс шалтгаалах алдааг багасгаж, хэрэглэгчдэд стандарт шаардлага хангасан мэдээ мэдээллээр шуурхайн үйлчлэх нөхцөлийг бүрдүүлсэн.

Хэрэглэгч буюу нисэхийн оператор компаниудын хэрэглэгч нар тусдаа username-account-аар орохгүйгээр дараах (http://103.111.68.42/mds/ni-5.aspx) хаягаар шууд хандан сервер дээр хадгалагдсан байгаа нислэгийн мэдээллийг огноогоор нь шүүж харах боломжтой. “Олон улс, орон нутгийн нислэгийн цаг уурын онлайн үйлчилгээний систем” программ хангамж нь НЦУТ-ийн Мэдээлэл үйлчилгээний хэлтсийн ажлын байрууд болон орон нутгийн УЦУОШТ-ийн нислэгийн үйлчилгээний синоптикийн ажлын байруудад ашиглаж  байгаа бөгөөд интернэт орчинд 24/7 горимоор  ажиллаж байна. Хэрэглэгчдийн хүсэлтээр дунд болон өндрийн нислэгт зориулсан чиглэлийн урьдчилсан мэдээг (НИ-5 хуудас) англи, монгол хэл дээр 2 сонголтоор бэлтгэн гаргах боломжтой. Мэдээлэл дамжуулах системийн “Нислэгийн төлөвлөгөө” хэсгийг шинэчлэн сайжруулсан ба төв, орон нутгийн УЦУОШТ-д цахимаар шуурхай мэдээлж, түгээх ажлыг үйлдвэрлэлд нэвтрүүлсэн. Энэхүү өөрчлөлт хийгдсэнээр нислэгийн төлөвлөлтөд урьдчилсан, өөрчлөлт орсон, хойшилсон, цуцлагдсан, нэмэгдэл нислэг, онцгой ба тусгай үүргийн, түргэн тусламжийн зэрэг нислэгийн ангилал төрлөөр тухайн нислэг үйлдэгдэх болон бэлтгэл буудалд ажиллах аймгийн УЦУОШТ-дийн инженер техникч нарт албаны болон хувийн цахим шуудангаар нь дамжуулж, урьдчилан мэдэгдэж, бэлэн байдлыг шуурхай ханган ажиллах боломжтой болсон.

Олон Улсын иргэний нисэхийн тухай Чикагогийн конвенцын Хавсралт 3-ын стандарт, шаардлагуудыг хэрэгжүүлэх зорилгоор Чикагогийн конвенцын Хавсралт 3 (ANNEX-3)-т 79, 80 дугаар нэмэлт, өөрчлөлт орсонтой холбогдуулан “Нислэгийг цаг уурын мэдээгээр хангах журам”-ын шинэчилсэн найруулгыг Иргэний нисэхийн ерөнхий газрын дарга, Цаг уур, орчны шинжилгээний газрын даргын хамтарсан А/267/А164 дүгээр тушаалаар баталж, 2023 оны 9 дүгээр сарын 15-ны өдрөөс эхлэн Иргэний нисэхийн үндэсний төвийн харьяа алба, салбарууд, орон нутгийн Ус цаг уур, орчны шинжилгээний төвүүд, нисэх буудлууд, агаарын тээвэрлэгч байгууллагууд үйл ажиллагаандаа мөрдөж ажиллаж байна.

Нислэгийн цаг уурын төвийн аюулгүй байдлын удирдлагын тогтолцоог хэрэгжүүлэх ажлын төлөвлөгөө гаргаж Иргэний нисэхийн ерөнхий газраар батлуулсан. Тус төлөвлөгөөний хүрээнд Зөрүүтэй байдлын дүн шинжилгээ (GAP ANALYSIS) хийж, Өөрчлөлтийн аргачлал (Evolution tool), эрсдэлийн үнэлгээ, SPI-гүйцэтгэлийн шалгуур үзүүлэлтийг таарц, саатал гэсэн элементээр сүүлийн 10 жилийн сар бүрийн мэдээллийг боловсруулан гаргаж Нисэхийн аюулгүй ажиллагааны хяналт, зохицуулалтын алба (НААХЗА)-нд хүргүүлсэн. Аюулгүй байдлын удирдлагын журамд Олон улсын иргэний нисэхийн байгууллагын (ICAO) ANNEX 19, DOC 9859-ийн дагуу нэмэлт, өөрчлөлт оруулан үүнтэй холбоотой 5 журамд нэмэлт өөрчлөлт оруулан, нэгтгэж Аюулгүй байдлын удирдлагын нэгдсэн журам болгон Иргэний нисэхийн ерөнхий газраар хянуулсан.

Иргэний нисэхийн ерөнхий газрын Нисэхийн аюулгүй ажиллагааны хяналт, зохицуулалтын албанаас томилогдсон Аудитын багийнхан ИНД-174-ийн “Нисэхийн цаг уурын үйлчилгээ эрхлэх байгууллагыг гэрчилгээжүүлэх” дүрмийн дагуу олгогдсон гэрчилгээний хүчинтэй хугацааг сунгах төлөвлөгөөт үзлэг шалгалт явуулсан. Нисэхийн цаг уурын үйлчилгээг Иргэний нисэхийн тухай Монгол улсын хууль, Иргэний нисэхийн багц дүрэм (ИНД-174) болон холбогдох бусад дүрэм, журмын дагуу үзүүлэх “Нисэхийн цаг уурын үйлчилгээний байгууллагын гэрчилгээ”-г 2026 он хүртэл 3 жилийн хугацаатай сунгаж, гэрчилгээ авсан.

Ус цаг уурын алба үүсэж хөгжсөний 100 жилийг ойг угтсан арга хэмжээний хүрээнд өөрсдийн нөөц бололцоогоор төв байрны урсгал засварын ажлыг хийж тохижуулсан.